اسلام آباد۔ 24 مئی (اے پی پی) حکومت پاکستان ٻاہرلے مُلکاں توں ڈی پورٹ کیتے وںڄݨ آلے شہریاں دے خلاف سخت کارروائی کرݨ دا فیصلہ کیتِے۔ وفاقی وزیر داخلہ محسن نقوی دی صدارت اچ ہک اعلیٰ سطح دے اجلاس اچ فیصلہ کیتا ڳئِے جو سارے ڈی پورٹیز دے خلاف فرسٹ انفارمیشن رپورٹس (ایف آئی آر) درج کیتیاں ویسن۔ ایں توں انڄ انہاں دے پاسپورٹ منسوخ کر ݙتے ویسن اتے انہاں دے ناں پنج سال دی مدت کیتے پاسپورٹ کنٹرول لسٹ (PCL) اچ رکھیے ویسن۔وزیر داخلہ ایں ڳالھ تے زور ݙتِے جو مُلک بدر کیتے ڳئے بندے بین الاقوامی سطح تے پاکستان دی بدنامی دا باعث بݨدے پئن اتے حکومت ایں سلسلے اچ زیرو ٹالرنس دی پالیسی اپنیسی۔ محسن نقوی آکھیِے ٻاہرلے ملک پاکستان دا تشخص خراب کرݨ آلیں دے نال کوئی نرمی کائنی ورتی ویسی۔ ایں اقدامات تے مؤثر عملدرآمد کوں یقینی بݨاوݨ کیتے سیکرٹری داخلہ خرم آغا دی سربراہی اچ ہک کمیٹی بݨائی ڳئی اِے جیڑھی موجودہ پاسپورٹ قوانین اتے ضوابط دا جائزہ گھنسی اتے انہاں کوں مزید بہتر بݨیسی۔ اجلاس اچ وزیر مملکت داخلہ طلال چوہدری، وفاقی تحقیقاتی ادارے (ایف آئی اے) دے ڈائریکٹر جنرل رفعت مختار راجہ ا??ے ڈائریکٹر جنرل پاسپورٹ مصطفی جمال قاضی وی شرکت کیتی۔ اے اقدام پالیسی اچ ہک اہم تبدیلی دی نشاندہی کریندِے جیڑھا غیر قانو??ی ہجرت اتے مُلک بدری دے معاملیں دے بین الاقوامی مضمرات تے وِدھدی ہوئی فِکر کوں مکاوݨ کیتے حکومت دے عزم کوں ظاہر کریندے۔
